CEB CITY-Sikop sa mga kapulisan ang usa ka kriminal human kini nagtago-tago sa pipila ka tuig pasado alas 10:50 sa kagabion niadtong Hunyo 20, 2024 didto sa Nivel Hills sakop sa Brgy Busay ning dakbayan sa Sugbo.
Arestado ang usa ka 34 anyos nga lalaki human sa malampuson nga nadakpan pinaagi sa pagsilbi sa warrant of arrest.
Basi sa imbistigasyon, ang akusado usa ka lumad nga taga Davao del Norte kinsa gipasakaan og kasong Frustrated Parricide, Murder og Homicide ubos sa lagda ni Presiding Judge Hon. Arlene Lirag Palabrica sa RTC 11th Judicial Region Branch 31 sa dakbayan sa Tagum, Davao del Norte.
Naisyu kining maong warrant niadton pang August 26, 2021 ug walay piyansa ang gisang-at.
Naaresto ang akusado sa mga personahe sa Mabolo Police Station 4 kauban ang mga personahe sa Santo Tomas Municipal Police Station, Davao del Norte PIT, RID 11, Metro Cebu CIT-RIU 7, PIDMU, DNPIU, ug 2nd Davao Norte PMFC.
Kasamtangan balhog sa kustodiya sa Mabolo Police Station 4 ang maong akusado ug itransfer kini pabalik sa hurisdiksyon sa Davao del Norte aron ipresentar ngadto sa nag-isyu nga korte.
