Dungan sa hingpit nga pag-implementar karon sa taas nga usbaw sa mga produktong lana sa tibuok nasud, niduyog usab ang singgit sa mga motorista nga wagtangon na ang VAT ug Excise Tax, kinsa kasamtangan kini gipahamtang sa gobyerno.
Subay niini, ekslusibong gikuha sa Bombo Radyo Cebu newsteam si Sonny Africa, ang Executive Director sa Ibon Foundation aron ipasabot kung unsa ang tinubdan sa pagpahamtang sa VAT ug Excise Taxes.
Matod ni Africa, ang gobyerno nagpahamtang sa Php 10.00 Excise Tax kada litro sa gasolina, Php 6.00 kada litro sa diesel, Php 5.00 kada litro sa kerosene, ug kini alang sa dugang nga kita kon income niini.
Dugang ni Africa, ang excise tax nagpasabot nga sa matag litro sa produktong lana, aduna kini nagkadaiyang kantidad nga awtomatikong ihamtang.
Samtang, gitino niini nga lahi usab ang Value Added Tax (VAT), gumikan aduna usab kini 12% nga ipahamtang sa “final” nga presyo sa matag lana’ng produkto.
Busa, gikabutyag ni Africa nga dako og kita gobyerno niini matag tuig, subay usab sa iyang kasayuran niadtong 2024, diin ang gobyerno adunay kita nga kapin sa 300 billion pesos matag tuig gumikan sa excise tax ug sa Value Added Tax.
Busa, gihimug-atan niini nga dako tabang ug mas mogaan-gaan na kung ugaling kaltasan ang maong pagpahamtang sa matang sa buwis sa produktong lana.
Kini gumikan kay mamahimong makaminus og 16 hangtud 17 pesos sa presyo sa gasolina, 11 pesos sa presyo sa diesel, ug gibana-banang 13 pesos sa presyo sa kerosene, kini kung ugaling kaltasan ang mga naasoyng buwis basi sa kasamtangan presyo sa produktong lana.
