Giaprobahan ni Cebu City Mayor Nestor Archival ang pagpalit og mga electric vehicles nga nagkantidad og ₱12 milyones alang sa Cebu City Police Office (CCPO) ubos sa Peace and Order Program sa dakbayan.
Ang maong lakang nagpakita sa pasalig sa kagamhanan sa dakbayan sa pagpalig-on sa police mobility samtang nagduso sa sustainability agenda niini.
Gidayeg usab sa Mayor ang CCPO sa pagdawat sa eco-friendly practices, pagpasiugda sa ilang water catchment system, gardening efforts, ug suporta sa city-led programs sama sa One Tumbler at a Time, Energy Efficiency Campaign, ug ang 256K Trees Project.
Atol sa iyang pagbisita sa CCPO gahapong adlawa, Biyernes, Septiyembre 26, 2025, gisugat si Mayor Archival, ni Acting CCPO Director PCol Enrico E. Figueroa, uban sa mga station commander ug ubang mga pulis ug personnel sa CCPO.
Gitataw ni Mayor Archival, nga ang panagtambayayong tali sa kagamhanan sa dakbayan ug sa kapolisan labaw pa sa pagpatuman sa balaod, nga nagpasiugda sa ilang giambitan nga tahas sa pagtukod sa mas luwas, limpyu, ug mas malungtarong dakbayan sa Sugbo.
