7 patay sa kaylap nga pagbaha ug pagdahili sa yuta sa Ishikawa, Japan

ISHIKAWA, JAPAN- Patay ang pito ka tawo tungod sa kaylap nga pagbaha ug pagdahili sa yuta sa Ishikawa Prefecture sa Japan.

Ingon man labing menos 11 ang gikatahong padayon pa nga gipangita.

Bisan ang mga siyudad sa Wajima ug Suzu, nga kasamtangang nagrekober human naigo sa linog niadtong Enero kay nalubog usab sa kaylap nga pagbaha.

Resulta kini sa pila ka adlaw nga pag-ulan sa lugar ug misangpot sa kaylap nga pagbaha, nga adunay daghang mga suba nga mi-awas sa ilang mga sapa.

Duha sa mga patay ang nakit-an duol sa tunnel nga naigo sa landslide sa Wajima samtang ang usa kay construction worker nga nagtukod og dalan.

Mokabat usab sa kapin 5,000 ka mga panimalay ang nakasinati og kakuwang sa tubig tungod sa power outages ug water pipe damage.