CEBU CITY-Gipahibalo ni Cebu City Mayor Raymond Garcia nga dili makatambong si President Bongbong Marcos isip dinapit sa Sinulog Grand parade 2025 sa Cebu City Sports Center karung adlawa Enero 19,2025.
Apan, iyahang ipadala si Antonio Lagdameo Jr, ang Special Assistant to the President atol sa naasoy nga kalihokan.
Mao kini ang gipahibalo sa Mayor atol sa Fluvial Procession kagahapong adlawa Enero 18,2025.
Gidugang sa Mayor nga iyahang paningkamotan nga magmalamposon ang selebrasyon sa Sinulog 2025, ilabi na nga gipanglantawan ang bul-og sa katawhan kay gibalik na kini sa naandan nga venue sa Cebu City Sports Center human sa duha ka tuig nga gipahigayon kini sa South Road Properties (SRP).
Gipaabot ang dili mominos 40 ka contingents ang mosalmot sa 2025 Sinulog Festival Grand Parade ug Ritual Showdown.
Una na nga nangandam ang mga organizers sa gidaghanon sa mga tawo nga modoble kaysa niaging tuig.
Aron matubag ang maong isyu, nagbutang ang mga organizer og bleachers nga susama sa gigamit sa South Road Properties (SRP) atol sa Sinulog 2024.
Kung diin, kapin sa 600 ka bleachers, matag usa adunay kapasidad nga 24 ka tawo.
Gibanabana nga kini maka-accommodate sa mga 11,000 ka mga tumatan-aw, ug sila estratehikong ibutang sa agianan sa parada.
Nakig-alayon usab ang SFI sa Cebu City Government ug local security forces aron masiguro ang kaluwasan ug seguridad sa mga tawo atol sa selebrasyon.
