MANDAUE CITY,CEBU- Gipanghakot na ang mga nagtapun-og nga mga medical waste nga temporaryong nahimutang sa karaang Cebu North Bus Terminal nga karon kay pasilidad sa City Environment and Natural Resources Office (CENRO) sa Barangay Subangdaku sa dakbayan sa Mandaue kagahapong adlawa sa Miyerkules, Hulyo 9, 2025.
Kini nga aksyon kay nahisubay sa mando nga giluwat ni Mandaue City Mayor Thadeo Jovito “Jonkie” Ouano.
Diin adunay gi-kontratang bag-ong service provider nga mao ang Cleanaway Philippines Inc. nga muhipos sa mga special medical waste.
Gikatakda kining ibyahe ug dalhon sa silingang lalawigan sa Leyte aron sa insakto ug hapsay nga pagproseso sa maong basurang gikan sa mga tambalanan.
Anaa sa kinatibuk-ang ihap sa 301 ka mga drum sa medical waste ang giproseso diin kabahin sa paningkamot sa syudad nga luwas nga ma-dispose ang maong basura para sa pagpakabana sa kinaiyahan ug isig ka lungsuranon sa dakbayan.
