Nagpagawas og pasidaan si Dumanjug Mayor Gungun Gica ngadto sa mga residente nga nagpuyo sa mga hazard zone human sa pagbaha nga gidala sa Tropical Depression Wilma.
Gi-awhag niya ang tanan nga mobakwit dayon samtang nagpadayon ang pagtaas sa tubig-baha, ilabi na sa mga komunidad nga pirming maapektahan sa pag-awas sa suba.
Gipasabot usab sa mayor ang kontrobersyal nga pagkahugno sa flood control wall sa Barangay Kang-actol, nga ang pagkaguba sa istruktura tungod sa kusog sa tubig o force majeure ug dili tungod sa substandard nga trabaho.
Matod pa niya, giigo ang pader sa sobra nga hydrostatic pressure nga milabaw sa normal nga kapasidad sa disenyo niini.
Bisan pa sa iyang pasabot, gimando gihapon ni Gica ang usa ka imbestigasyon aron masuta ang tinuod nga hinungdan sa insidente ug aron masiguro nga mas lig-on ug mas luwas ang mga umaabot nga flood control projects sa Dumanjug.
Gipasiugda usab sa mayor ang kaepektibo sa ilang disaster mitigation efforts, nga walay naangol sa miaging Bagyong Tino usa kunong pamatuod nga naglihok ang ilang mga inisyatibo batok sa peligro sa katalagman.
Samtang, ang Office of the Civil Defense–Central Visayas (OCD-7) nagrekomendar og preemptive evacuation sa nagkalain-laing lungsod ug siyudad isip pagpangandam.
Sumala ni OCD-7 Regional Director Joel Erestain, nakig-alayon na sila sa mga LGU, ilabina sa mga lugar nga grabeng naigo sa miaging mga bagyo nga Tino ug Verbena.
Nagpadayon usab ang hugot nga pagmonitor sa mga kabukiran sa Cebu nga posibleng tinubdan sa runoff ug flash flooding.
Bisan tuod ang Wilma dili gilauman nga sama ka kusog sa Tino, gipasiugda ni Erestain nga mas maayo nga doblehon ang pagpangandam aron malikayan ang bisan unsang mga aksidente ug kadaot.
