Gitaho sa Cebu City Police Office (CCPO) nga naging malinawon ug hapsay ang gipahigayong “Halad sa Pagtuo 2026” niadtong Sabado, Agosto 29, 2026.
Gibanabana nga moabot sa 7,000 ka mga tawo ang nisaksi sa maong kalihokan nga kabahin sa pagsaulog sa ika-457 nga Annibersaryo sa Pagtukod sa Lalawigan sa Sugbo, diin gipasundayag ang adunahang pagtuo, kultura, tradisyon, ug panaghiusa sa mga Sugboanon.
Aron masiguro ang kaluwasan sa publiko, ang CCPO ubos sa pagpangulo ni Police Colonel Ricky Sumalde nagpakatap og dul-an 600 ka mga sakop sa kapolisan kauban ang mga augmentation forces gikan sa nagkalainlaing sanga sa gobyerno.
Nagsugod ang ilang pagbantay gikan sa pagsugod sa kalihokan sa udto hangtod na sa pagkahuman niini sa gabii, diin mismo si Col. Sumalde ang nagdumala sa seguridad sa ruta sa prosesyon gikan sa Kapitolyo padulong sa Cebu City Sports Center aron malikayan ang kahuot sa trapiko ug mapadayon ang kahusay.
Nanguna sa prosesyon ang moabot sa 50 ka karosa nga nagdala sa nagkalain-laing patron sa mga lungsod ug siyudad sa probinsya, ug mapasigarbohong gipahayag sa kapolisan nga zero crime ug walay bisan unsang untoward incident nga natala sa tibuok nga okasyon.
Tungod niini, pormal nga gipasalamatan ug gipasidunggan ni Col. Sumalde ang tanang opisyal ug mga indibidwal nga nitabang aron maging luwas ug malampuson ang maong dakong kasaulogan.
