Gipalig-on sa Bureau of Customs (BOC) ang pag-monitor sa mga pantalan ug utlanan sa nasud agi’g pangandam sa pagsaka sa gidaghanon sa mga imported nga produkto ug balikbayan boxes samtang nagkaduol ang panahon sa Pasko.
Matod ni BOC Commissioner Ariel Nepomuceno, nagpadayon ang ahensya sa pagpatuman sa mga regulasyon, pagpahigayon og mga inspeksyon, ug paglusad og mga operasyon batok sa smuggling aron masiguro ang hapsay nga pagproseso sa mga kargamento taliwala sa pagdagsa sa mga kargamento gikan sa gawas sa nasud.
Gitubag usab sa ahensya ang mga reklamo kalabot sa mga balikbayan box nga wala makaabot sa mga angay nga makadawat niini.
Gipahayag ni Nepomuceno nga nagpadayon ang koordinasyon sa BOC uban sa mga nasud nga nag-unang tinubdan sa mga kargamento gikan sa mga Pilipino aron makahimo og aksyon batok sa mga kompanya nga giingong nangilad sa mga nagpadala og balikbayan boxes.
Tumong usab niini nga koordinasyon ang pagpugong sa mga kompanya nga nalambigit sa maong ilegal nga mga kalihokan gikan sa pagparehistro o pagpadayon sa ilang operasyon.
Tungod niini, gitambagan ang mga overseas Filipino worker ug uban pang nagpadala og balikbayan boxes nga susihon pag-ayo ang kredibilidad sa ilang gipili nga cargo o forwarding company ug tipigan ang mga resibo ug dokumento sa transaksyon.
Gipasalig sa BOC ngadto sa publiko nga ipadayon niini ang mga paningkamot sa pag-monitor aron mapanalipdan ang mga konsumidor ug masiguro ang pagsunod sa mga regulasyon nga nagdumala sa pagsulod sa mga produkto ug kargamento sa nasud.
