CEBU CITY — Patay ang usa ka American-national human nabangga ang gisakyan nining motor og laing motorsiklo sa Barangay Poblacion, sa lungsod sa Carmen, Cebu.
Giila ang 66-anyos nga biktimang si Albert Kull, ug nanimuyo sa Sugbo kauban ang iyang Filipina girlfriend.
Matud ni Patrolman Francisco Dumasig sa Carmen Police Station nga nagmaneho si Kull sa iyang motorsiklo niadtong Nobyembre 23 sa gabii ug mibangga kaniya ang laing motorsiklo nga gimanehoan sa nagpailang si Vicente Ramos Jr.
Nahulog ang maong American-national sa gimanehoan niining motor ug nakaangkon kini og mga samad ug bun-og sa lawas.
Gidala dayon ang biktima sa tambalanan apan namatay kini gilayon human gi-atake sa iyang kasingkasing.
Dugang pa ni Dumasig nga giingong nakainom Kull sa dihang nag-drive sa motor human kini nagpositibo sa liquor test.
Nagpaabot ang kapulisan kung mopasaka ba og kaso ang habig sa American-national batok sa driver sa motor nga mibangga sa biktima.
