Girekomendar sa Bohol Office of the Provincial Veterinarian (OPV) ang pagpadaghan sa azolla (mosquito fern) aron ikadugang sa mga lawg sa farm animals alang sa mas himsog ug mas lamian nga karne niini.
Kini ang nahimong pamahayag sa buhatan nunot sa nagkamahal nga presyo sa mga lawg sa baboy, manok, ug uban pang binuhing hayop.
Sumala pa ni Bohol OPV Agricultural Center Chief Aida Sumampong kay naghatag na sila sa azolla aron padaghanon tungod kay taas kini sa protein content nga milapas sa 20% nga maayo isahog sa mga lawg sa manok ug baboy.
Gani ang azolla kay dali ra nga padaghanon nga kasagaran makita sa mga basakan, canal, danawan, sapa, ug suba.
Pwede kining isahog sa mga lawg sama sa tahop, mais, kinagod nga lubi, tangkong, ug uban pa nga pwede ipakaon sa mga baboy ug manok nga makahatag og kalidad nga karne ig harvest niini kun itandi sa mga commercial feeds.
Dugang niini nga andam ilang buhatan nga muhatag ug magpaliwat sa maong tanom nga libre gikan sa ilang farm sa lungsod sa Bilar, Bohol.
Usa sa mga target sa Bohol OPV ang mga dairy farmers sa lungsod sa Ubay nga may mga binuhing kabaw ug baka.
Tumong niini ang paghatag og maayong tinubdan sa protina alang sa mga kahayopan sulod sa tibuok tuig nga makapadaginot sa galastuan sa mga nagbuhi sa kahayupan.
