CEBU CITY-Mag-atubang og daghang reklamo ang tulo ka mga lalaki, lakip ang usa ka midaog nga kandidato sa pagka konsehal sa barangay, kinsa giingong nalambigit sa insidente sa harassment sa Barangay Tapon, lungsod sa Dumanjug, Cebu lakip na ang physical injury, grave threats ug kalapasan sa gun ban nga gipahamtang sa Commission on Elections ( Comelec).
Matud ni Police Captain Jan Ace Layug, Hepe sa Dumanjug Police Station nga ang tulo ka mga lalaki giila sa mga otoridad gikan sa upat ka mga lalaki nga nakita sa video nga nagdala og armas ug gisikaran pa ang mga biktima.
Nag-viral online ang video sa adlaw sa eleksyon Lunes, Oktobre 30, 2023.
Usa sa gitumbok mao ang midaog nga konsehal sa bag-o lang nahuman nga Barangay ug Sangguniang Kabataan Elections (BSKE) 2023.
Giandam na karon sa Dumanjug Police Station ang mga dokumento nga gikinahanglan sa pagpasaka og kaso batok sa tulo ka suspek nga natumbok sa video.
Apan nagdumili ang kapulisan sa pagbutyag sa publiko sa mga ngalan sa mga suspek samtang nagpaabot pa sa pagpasaka og mga reklamo sa Cebu Provincial Prosecutor’s Office.
Mag-atubang og reklamong physical injury, grave threat ug kalapasan sa Republic Act 10591 o Comprehensive Firearms and Ammunition Regulation Act ang mga suspek tungod sa illegal possession of firearms ug kalapasan sa Comelec gun ban.
Sa laing bahin, ang Comelec nagpadayon sa reklamong administratiba batok sa usa sa mga suspek nga midaog pagka konsehal sa barangay sa Barangay Tapon.
Bisan og wala nila mabawi ang mga armas, ipasaka gihapon ang reklamo sa illegal possession of firearms batok sa mga suspek tungod kay klarong makita sa online video ang ilang paggamit og armas.
