Mihatag og katin-awan ang Cebu City Police Office sa mikatap nga video sa social media sa usa ka Traffic Enforcement Unit Officer, nga giingung personal nga migamit sa usa ka motor nga gi-impound.
Matud ni Police Lieutenant Colonel Jose Losbaños, ang tigpamaba sa Cebu City Police Office nga ang maong insidente tinoud gayud nga nahitabo nga gigamit gayud sa usa ka TEU-officer ang maong motorsiklo.
Sigon niini nga atol sa gipahigyon nga pagpanakop sa mga sakop sa kapulisan sa mga naggamit og modified mufflers niadtong Marso 1, 2026, gimandoan ang tropa nga ipadala ang dinakpan nga motorsiklo sa Cebu City Headquarters aron ihatud sa impounding Area sa Land Transportation Office.
Apan gitug-an ni Losbaños, nga walay truck nga magamit alang sa pagkarga sa maong mga motor hinungdan nga gimanihoan nalang kini sa gitudlong TEU-officer, apan giklaro usab niini nga naka log-book hinoun kini una kini gihatud sa Headquarters.
Gihimug-atan niini nga walay nakitang kalapasan ang maong uniformed personnel gumikan kay dali ra usab kining nakaabut sa istasyon kapin 20-minutos ang milabay una kini nadakpan.
Gane, gi-presentar sa mga kapulisan ang mga nakuhang ebidensya pinaagi sa mga CCTV footages nga nagpamatuod sa wala paggamit niini sa personal, hinungdan nga gipaningkamotan sa CCPO nga makakita og truck nga pwedeng kargahan sa maong mga dinakpan nga motor.
Mipahimangno usab ang kapolisan sa mga adunay reklamo hilabi na sa susamang kaso, dili mo lahus og upload sa social media inay iberipikar una ang mga impormasyon.
