Padayon ang pag-awhag sa Commission on Elections – Central Visayas (Comelec-7) ang publiko sa papa-rehistro sa mga botante karong holiday season isip kabahin gihapon sa pagpangandam sa November 2, 2026 Barangay and Sangguniang Kabataan Elections (BSKE).
Kini ang gipamahayag ni Atty. Franciso Pobe Jr., ang Regional Director sa DSWD-7 sa eksklusibong pakighinabi niini sa Bombo Radyo Cebu News Team diin sumala pa nagsugod ilang registration para sa mga bag-ong botante niadtong Oktubre 20, 2025 nga mulahutay sa sunod tuig sa buwan sa Mayo nga gipahigayon sa mga municipal, city, ug satellite offices sa Comelec sa rehiyon.
Sumala sa datos sa Comelec-7 nga adunay nay 53,524 ka mga bag-ong botante sa rehiyon diin 25,819 kay mga lalaki ug 27,705 ka mga babaye.
Hagit karon sa buhatan ang pagkab-ot sa mga dapit nga hilabihang naapektohan sa mga nakalabayng katalagman sama nalang niadtong 6.9 magnitude nga linog sa amihanang Sugbo ug ang nakalabayng Bagyong Tino.
Pahibalo sa Comelec-7 nga abli ang ilang mga buhatan para sa rehistrasyon sa mga botante gikan sa adlawng Lunes hangtod sa Sabado (alas 8 sa buntag hangtod sa alas 5 sa hapon), depende nalang sa matag lokalidad isip panawagan nga malikayan ang tioun-og ang last minute registration sa Mayo 2026.
