Gipasabot sa International Criminal Court (ICC) nganong kinahanglang dakpon si kanhi Presidente Rodrigo Duterte nunot sa kataposang pagluwat sa warrant of arrest batok kaniya.
Sa 15-page order nga giluwat sa ICC ug gipirmahan nila ni Pre-Trial Chamber Presiding Judge Julia Antoanella Motoc, Judge Sophie Alapini-Gansou, ug Maria del Socorro Flores Liera, nga importante nga dakpon ug hingpit nga madetene si Duterte aron maseguro nga makatambong kini sa ipahigayon nga hearing.
Ingon man nga dili makasigurado ang ICC nga mokooperar ang kanhi kung padalhan lang kini og summon.
Matod sa international court, ang desisyon resulta usab sa mga kabalaka nga ang kanhi presidente aduna gihapo’y lapad nga impluwensya bisan pa man nga wala na siya nagkupot og bisan unsang posisyon.
Gihingusgan usab sa ICC nga adunay ‘heightened risk of interference’ o ang posibilidad sa pagpanghilabot sa imbestigasyon ug posibleng hulga sa mga saksi ug mga biktima.
Gumikan niini giingong importante ang dinaliang pagdakop sa kanhi presidente aron mamintinar ang integridad sa umaabot nga trial ug malikayan ang pagkalangan o pagkabalda sa nagpadayong legal nga proseso.
Ang ICC Pre-Trial Chamber unang niisyu sa warrant niadtong Marso 7 tungod sa giingong mga crimes against humanity sa kanhi presidente sukad pa niadtong mayor pa siya sa Davao City ug dihang nahimo na siyang presidente sa Pilipinas.
