METRO MANILA-Namahayag si kanhi Commission on Elections Commissioner Andy Bautista nga ang kaso batok kaniya sa Amerika naimpluwensiyahan sa politika sa mga mahinungdanong opisyal sa Pilipinas.
Sa iyang social media account, si Bautista niinsister nga makig-tigi siya aron maabsuwelto sa korte ug ipakita nga wala siyay nahimo nga krimen batok sa gobyerno sa Amerika o sa katawhan sa US ug wala siya nagpahimulos o wala’y gidapigan sa bisan unsang paagi.
Matod niya, nakadaog sa kontrata ang voting machine company sa wala pa, atol ug human sa iyang pamunoan isip Chairman sa Comelec, usa ka tahas nga iyang nahimo sa 2016 elections uban ang kadasig ug abilidad sa pagserbisyo sa katawhang Pilipino.
Nihimo sa maong pamahayag si Bautista human gipasakaan og kaso sa US Federal grand jury sa Florida tungod sa giingong pagdawat og suborno gikan sa Smartmatic nga maoy naghatag sa mga voting machine nga gigamit sa 2016 general elections sa Pilipinas.
Ingon man nga ang kanhi hepe sa poll body nag-atubang sa usa ka ihap sa panagkunsabo sa paghimo sa money laundering ug 3 ka ihap sa internasyonal nga laundering sa mga instrumento sa kwarta base sa US Justice Department.
Gawas kang Bautista, laing 3 ka mga executive sa voting machine company ang gipasakaan og kaso tungod sa ilang papel sa giingong bribery ug money laundering scheme aron mapadayon ang ilang negosyo nga may kalabotan sa 2016 PH elections lakip na si Roger Alejandro Pinate Martinez, usa ka Venezuelan citizen ug residente sa Florida nga mao ang co-founder sa Smartmatic.
