CEBU CITY-Gibutyag sa labing taas nga opisyal sa kapolisan sa dakbayan sa Sugbo nga andam na ang kaso batok kang Simeon Gabutero, ang suspek sa pagpatay kang Rhea Mae.
Matod ni Cebu City Police Office (CCPO) Chief Police Colonel Ireneo Dalogdog, karong semanaha ipasaka ang kasong pagpatay kang Gabutero.
Apan ang pamilya sa biktima didto sa Mindanao nipahibawo sa mga otoridad nga nagplano sila nga moanhi sa Sugbo aron personal nga mapasaka ang kaso.
Kung kahinumduman si Tocmo nadiskubrehan nga patay sulod sa karton daplin sa dalan sa Sitio Mohon, Barangay Tisa, dakbayan sa Sugbo niadtong Hulyo 17, 2023.
Gilantaw ni Dalogdog nga lig-on ang ilang kaso tungod sa ilang nahipos nga mga ebidensiya, lakip na ang CCTV footage, cellphone sa biktima, ang findings sa DNA test, ug ang pag-angkon sa nag-unang suspek nga si Gabutero, nga iyang gipatay si Rhea Mae.
Mohatag usab og sworn statement ang 13-anyos nga igsuon sa suspek kinsa diha sa dihang gilabay ang lawas ni Tocmo sa Sitio Mohon.
Samtang ang habal-habal driver nidangop usab sa Labangon Police Station karong bag-o ug niangkon nga siya ang naghatod sa biktima paingon sa Sitio Sampaguita sa Banawa, Barangay Guadalupe, dakbayan sa Sugbo, diin nagpuyo si Gabutero ug nibayad sa plitehan ni Rhea Mae.
