Daling nakadawat sa mga pasiunang mga hinabang ang mga biktima sa miulbing sunog sa Barangay Tabok, dakbayan sa Mandaue niadtong Nobyembre 4.
Paspas ra usab nga mirespondi ang mga sakop sa kabomberohan ug dali usab nga gi-assess sa Mandaue City Social Welfare Services (CSWS) ang mga residente nga naapektohan sa sunog.
Nahatagan na usab sila sa lokal nga kagamhanan og pack lunch meals ug disaster kits nga naglakip sa hygiene items, habol, ug uban pang panginahanglanon sa emerhensiya.
Basi sa inisyal nga assessment, 27 ka pamilya o anaa sa 96 ka mga indibidwal ang naapektohan ug kasamtangan nga anaa sa evacuation site samtang nagpadayon ang profiling ug assessment aron masiguro nga matag-usa makadawat sa tukmang tabang.
Personal usab nga gisusi ni CSWS Focal – Executive Assistant III Glydiza Gochoco ang sitwasyon sa mga biktima aron masiguro ang kaluwasan ug kinahanglanon sa mga biktima.
Gipasiugda ang paspas nga aksyon ubos sa liderato ni Mayor Thadeo “Jonkie” Ouano, nga nagpasabot sa tinuoray nga pagpaningkamot sa lokal nga kagamhanan nga unahon ang katawhan panahon sa katalagman.
Samtang, sa pakighinabi sa Bombo Newsteam kang Sherwin Udang, usa sa mga nasunugan, gipaambit niini nga hapit pa kini nga maangol human nga natumba sa dihang paingon pagawas sa iyang balay.//
Ingon man nga luwas siya apan ang iyang iro kay wala naluwas ug naapil kasunog.
