Gikumpirmar sa National Bureau of Investigation (NBI) nga adunay mga importante ug sensitibo nga dokumento nga nakuha gikan sa gi-raid nga condo unit ni Zaldy Co sa Bonifacio Global City, Taguig.
Sumala sa tigpamaba sa NBI nga si Atty. Palmer Mallari, giablihan sa mga awtoridad ang tulo ka vault ug nakuha gikan niini ang pipila ka sensitibo nga mga dokumento nga magamit sa pagpadayon sa imbestigasyon sa eskandalo nga naglibot sa mga flood control projects.
Sa pagkakaron, nagpadayon pa ang imbentaryo sa mga nabawi nga dokumento, nga sumala sa NBI pulos importante nga ebidensya.
Isumiter sa nahisgutang opisina ang opisyal nga post-operation report niini ngadto sa Taguig City Regional Trial Court, nga nag-isyu sa gigamit nga warrant.
Basi sa sulod sa warrant, ang target mao ang pagkuha og ebidensya nga may kalabotan sa mga kaso sa graft ug malversation nga gisang-at batok sa kanhi Ako Bicol Partylist Representative.
Mas lapad ang sakop sa bag-ong warrant kon itandi sa miaging gi-isyu sa Makati RTC tungod kay gitugotan sa korte sa Taguig ang pag-abli sa mga vault nga nakit-an ug ang pagkumpiskar sa mga dokumento ug kwarta.
Bisan tuod adunay nakit-ang kwarta sa condo sa Taguig, kini mikabat lang sa P10,000.
