CEBU – “We need to experience the pain of process to achieve a better result”.
Kini ang pamahayag sa Binibining Tudela atol na sa tulomanong Bombohanay Bigtime sa Bombo Radyo Cebu.
Si Cianza Pearl L. Gutierrez, 23 anyus, ang representante sa lungsod sa Tudela sa ipahigayun nga Binibining Cebu 2019.
Isip usa ka empleyado sa Land Transportation Office (LTO), adbokasiya ni Gutierrez mao ang “road safety” kung diin matud pa, daghan nang nindut nga bisitahun sa Sugbo apan dili gayud luwas ang kadalanan hinungdan nga tuyu niini mao ang “road courses” nga ihatag ilabi na sa mga batan-on.
Gibutyag sa Binibining Tudela nga ang mga bag-ung tubo karun ang mugamit sa mga kadalanan sa mga umaabot nga panahon hayan kini sila ang angayan nga masayud sa tukma nga disiplina sa paggamit ug sakyanan, ingun man disiplina sa kadalanan.
Subay niini, uyon si Gutierrez sa “modernization program” sa transportasyon gumikan kay gikinahanglan gayud kini alang sa “fast paced environment”.
Giingung usa kini sa nag-antos sa ka trapik sa Sugbo hayan nakita niini ang impurtansya sa modernisasyon sa transportasyon.
Gi-asuy sa kandidata nga usa ka “agent” ang sakyanan sa mga krimen nga nahitabu hayan gikinahanglan nga masayud ang mga batan-on sa tukma nga paggamit niini.
Nagkanayun si Gutierrez nga kinahanglan lang nga dawatun sa publiko nga sa proseso sa modernisasyon anaa gayud ang kahasol apan giingung magbunga man usab kini ug maayung resulta alang sa tanan.
Samtang, kumpyansa si Tudela Mayor ug kanhi station manager sa Bombo Radyo Cebu, Greman ‘Jojo’ Solante, nga daku ang tsansa nga mudaug ang ilahang representante sa Binibining Cebu 2019.
Gibutyag ni Mayor Solante nga daku niini nga garbo nga gipili ni Gutierrez ang Tudela nga pagadalhun sa naasuy nga pa-indigay.
Matud pa sa opisyal nga daghang mga LGU ang gusto unta nga mukuha ni Gutierrez apan gibalibaran kini sa kandidata.
Si Gutierrez ang gipanganak ug nagdaku sa lungsod sa Tudela.
Daku ang pagtu-u ni Solante nga mahimung umaabot nga ‘ambassadress’ sa ‘road safety’ si Gutierrez gumikan sa adbokasiya niini nga luwas nga kadalanan alang sa tanan.
Gihimug-atan ni Mayor Solante nga bisan pa man ug anaa sa ika-53 gikan sa 54 ka mga kandidata sa Bb. Cebu si Gutierrez hayan musibaw gayud ang kaanyag ug kalantip sa ilahang kandidata.
