CEBU CITY — Padayong gisuta sa mga otoridad ang motibo sa kamatayon sa high school principal ug iyang igsuon human gipangpatay sa armadong grupo sa Brgy. Hibaiyo, Gihulngan City, sa Negros Oriental.
Giila ang mga biktima nga si Ardale Bayawa, 49 anyos, usa ka CID chief sa DepEd Gihulngan Division, ug ang igsuong si Arthur Bayawa, 55 anyos, ug principal sa Gihulngan Science High School, ug parehong nagpuyo sa nahisgutang dapit.
Matud sa Acting Chief sa Gihulngan PNP nga si Police Lieutenant Colonel Bonifacio Tecson, nga gipang-atake sa mga wala mailhi nga armadong lalaki ang panimalay sa managsuong Bayawa diin ilang giguba ang padlock sa main door aron makasulod.
Gipusil sa mga armadong kalalakin-an ang principal ug CID chief sa makadaghang higayon ug nakaangkon ang mga biktima og samad-pinusilan sa lawas.
Miikyas dayon ang mga armadong lalaki sakay sa ilang getaway vehicle.
Daling miresponde ang mga sakop sa Gihulngan PNP ug rescue team ug gidala sa tambalanan ang mga biktima apan dead on arrival na kini.
Sa laing bahin, nagpabiling blangko ang motibo sa pagpatay sa usa ka barangay kapitan sa Brgy. Poblacion sa susamang dapit.
Gipusil usab sa mga wala mailhing armadong grupo ang biktima nga si Romeo Alipan, 64 anyos, minyo, ug chairman sa Brgy. Buenavista.
Gidala ang biktima sa tambalanan tungod sa nahiagum nga mga samad-pinusilan sa iyang lawas apan dead on arrival usab kini.
Anaa na sa punerarya ang patayng lawas sa mga biktima samtang nagpadayon ang imbestigasyon.
