Niluwat og pamahayag si Department of Public Works and Highways (DPWH) Secretary Vince Dizon nga hatagan sila og higayon nga matul-id ang mga kakulian sa ahensya taliwa sa mga kontrobersiya sa giingong mga anomalosong proyekto.
Kahinumdoman nga si Sen. Sherwin Gatchalian niingon nga nisantop sa iyang hunahuna ang posibilidad nga mabungkag na lang ang DPWH, butang nga iyang giklaro sa ulahi kinahanglang tun-an.
Matod ni Dizon, bisan og nakasabot siya sa sentimento sa pipila, dili solusyon ang pagbungkag sa ahensya tungod kay maglangay lang kini sa mga kritikal nga proyekto ilabi na kadtong kinahanglang ipatuman panahon sa kalamidad.
Gitataw sa kalihim nga mas gikinahanglan karon ang lalom nga mga reporma sa DPWH aron malimpyohan ang han-ay ug manubag sa mga kurakot nga opisyal.
Gipasalig usab niya nga andam niyang tangtangon ang bisan kinsa nga nalambigit sa kurapsyon, bisan ang tanang regional directors ug district engineers.
